பொம்மை

நீ
நொண்டி விளையாடிக் கொண்டிருந்தபோது 
சிதறிய உன் அழகையெல்லாம் அள்ளிவந்து 
பொம்மையொன்று செய்தேன்

நீ
கண்ணாமூச்சி ஆடும்போது உன்
கண்களில் கட்டிய துணியை 
அந்த பொம்மைக்கு ஆடையாக்கினேன்

நீ
பல்லாங்குழி விளையாடிய போது
குழிகளில் நிரம்பிய உன் வெட்கத்தை 
அந்த பொம்மைக்கும் ஊட்டி விட்டேன்

நீ
ஊஞ்சலாடிய மரத்தடியில்
விழுந்து கிடந்த உன் சிரிப்புகளை
கொலுசுகளாக்கி பொம்மைக்கு
மாட்டி விட்டேன்
உன்னுடைய எல்லாவற்றையும்
எடுத்துக்கொண்டு நீயாகவே 
மாறிப்போயிருந்த அந்த பொம்மை

இப்போது
என்னை பொம்மையாக்கி
வேடிக்கை பார்த்துக்கொண்டிருக்கிறது ...!