நடுங்காதே மனமே
தூரத்தில் தெரிவது
வேறு யாருமல்ல
தேனின் தித்திப்பென அடி நாக்கில்
ஒட்டிக்கிடந்த ஒரு உறவுதான் அது
பக்கம் நெருங்கி உன்னை
கடந்து போகும் போது
உடைந்து போகாதே
உன்னைப்போலவே அந்த உறவும்
தேனீர் அருந்தவோ
பசி போக்கவோ வந்திருக்கலாம்
உன் சந்தோசத்தின் மீதொரு
பார்வைக் கல்லெறிந்தோ அல்லது
உண்மையில் பார்க்காமலே கூட
உன்னைத் தாண்டிப் போயிருக்கலாம்
கடந்த காலத்தின் நினைவுகளை
கண்களில் கொண்டுவந்து
ஆறிப்போனதாய் நினைத்துக் கொண்டிருக்கும்
காயங்களின் தழும்புகளைத் தடவிப்பார்க்காதே
கூண்டைத் திறந்துவிடும்
கைகளென மென்மையாக விலகு
சிறகுவிரிக்கும் பறவையென
அவளோ / அவனோ பறக்கட்டும்
அந்த சந்தோசத்தில்
உன் சந்தோஷமும் இருக்கிறதென நிம்மதி கொள் .....!!!
