சாக்லேட்டின் சுவை

வெளிநாட்டில் இருந்து
வாங்கி வரப்பட்ட நீளமான சாக்லேட் ஒன்று
என் கைகளுக்கு கிடைத்தது

உருகி குழைந்து போகாமல் இருக்க
பிரிட்ஜில் வைக்கவேண்டிய அதை
பிரம்மச்சாரிகள் வாழும் விடுதியின்
பீரோவுக்குள் வைத்திருந்தேன்

கதவு திறக்கும் போதெல்லாம்
வாசம் வந்து என்னை உசுப்பவில்லை அது
அழும் குழந்தையைப்போல
யாராவது எடுப்பார்களா என ஏங்கவில்லை அது

எழுதி முடித்துவிட்டு வைத்த முற்றுப்புள்ளியைப்போல
ஏதும் செய்யாமல் இருந்த அதை
இரண்டு நாள் கழித்து எடுத்து பிரிக்கையில்
மூலை மடிப்புகளில் ஒட்டியபடி வழிகிறது

எனக்கென கைநீட்டும் குழந்தையோ
எனக்கு வேண்டாமென சொல்லும் அம்மாவோ
பெரிய பீஸ் எனக்கென்னும் தங்கையோ
அடித்து பிடுங்கி தின்னும் நண்பனோ
இதழோரம் வழிய சுவைக்கும் காதலியோ இல்லாமல்

தனியாக உண்ணும்போது நாக்கில்
ஒட்டவே இல்லை அந்தச் சாக்லேட்டின் சுவை