எப்படிச் சொல்ல...?

பெரு நகர பேருந்தில் 

நரக பயணத்தில் 

பெண்ணாய் படும் 

அவஸ்தைகளை 

எப்படிச் சொல்ல...?

இருக்கைகள் நிறைந்த 

காலை வேளையில் 

கிடைக்கும் இடைவெளியில் 

என்னை நிறுத்திக்கொள்ள

முயலும் போராட்டத்தை 

எப்படிச் சொல்ல...?

உடைக்குள் ஊடுருவி 

உடல் தேடும் ஒருவனிடம் 

உடலுக்குள் மனுசி என்ற 

மனசொன்று இருப்பதை 

எப்படிச் சொல்ல...?

மல்லிகை கருகும்படி 

முதுகில் மூச்சுக்காற்றை 

ஊசியாய் இறக்கும் ஒருவனிடம் 

உனக்கும் என் வயதிலொரு 

சகோதரி இருப்பாளென 

எப்படிச் சொல்ல...?

கடக்கும் சாக்கில் 

கம்பியை பிடித்தபடி 

பின்னுரசும் ஒருவனிடம்  

பிசுபிசுப்பின் ஈரக்கசிவை 

எப்படிச் சொல்ல...?  

வெக்கை தகிக்கும் வியர்வையில்
வழிந்திறங்கும் துளிகளில் 

வாசம் நுகரும் ஒருவனிடம் 

உதிரம் கசியும் வலியை 

எப்படிச் சொல்ல...?

காலதாமதத்திற்கு காரணம் கேட்டு 

கைப்பேசியில் வந்து குதறும் 

மேலாளருக்கு 

"அந்த மூன்று நாட்களில்"
அலுவலகம் வர கொஞ்சம் தாமதமாகுமென்பதை 

எப்படிச் சொல்ல...???